Pe dromutne droma Pale palpale serojipe

O Helios Gómez lel kotor and-o terno thaj butbutǎqo espanikano dombikano nevikanipen kotar-o berśa 30, zorale influencaça p-i plàstika, p-i literatùra vi p-o siklipen, sas but pinŴardilo politikano ćiterno and-o trujalimàta e maśkarthemutne zervikane rigaqe. Sas naślǎrdo thaj gelo and-i tèmica and-e Frankosqo vaxt jekh baro kotor pesqe Ŵivipnasqo thaj, maj palal-o astaripen, pal-o b. 1939 b., lesqi buti thaj lesqo alav sas barbut bisterde. But zabades arakhlile lesqe butǎ, maj anglal and-i avlin e pikturaqi thaj maj palal and-i literatùra, thaj cèrra a cèrra śaj te arakhel palem o Helios Gómez pesqo ćaćo than and-i historia e Evropaqe dombimasqi, na sadaj sar grafìsta a vi sar literaturaqo manuś. Akate si te mothovas maj anglal pala lesqi buti lekhavdi, odolesqe si maj palal arakhlile. Na but Ŵene Ŵanen so lekhavdǎ zumavimàta, poèzie thaj jekh romàno so nas avridino. But lenθar sas lekhavde and-i tèmica, kaj sas les xakaj te drabarel and-i bibliotèka jekh òra k-o dives thaj kaj butivar lile lesθar o cèrra lil thaj lesqe nabut lekhavimasqe labne, kaj te na lekhel.

E Heliosesqe zumavimàta

Lekhavdǎs jekh „Història e Rromenqi”, savi si vi godǎqi aj vi kulturaqi bàza anda lesqi poèzia. Sar ka dikhas maj palal, na kamèlas te kiderel ćaćes a maj but kerlas buti and-i simbòlika, anda jekh alegòria savi vakǎrèlas pal-o vaxt e Frankosqo.

Odolesqe so i rromani nàcia na śundǒl and-e historiaqe purane lila, Ŵikana lekhavdǒl pe pala lenθe and-o XIV śeliberś amare eraqo, o Helios ròdel Ŵantripen katar-i nakhli vràma kaj te arakhel than e Rromenqe and-i Història e Paśutne Disǒrigaqi. PinŴarel i literatùra kotar-o romanticìsmo vaś-o egzotìko, pinŴarel o pustika pal-o phirde droma p-i Espània thaj lenqe mothovimàta pal-o rromane zakònura, thaj vi i història e Rromenqi, sar lekhavde la e Ŵantre ghaŴe andar-o filogikane rodlǎrimàta. PinŴarel vi e rromane lavustika so kerde but gaŴe and-e XVIII-tone śeliberśesqo agor. Xàlas xoli thaj pukavèlas kana on dikhènas thaj lekhavènas vaś-o Rroma fèri sar manuśa palpalde, avrićhudine, ćorre andar-i posiki thaj vi andar-i godi, sar kerènas but manuśa, save lekhavde vaś-i Espània thaj laqe Rroma, maj anglal o George Borrow (o Manual Azafia rinćhibardǎs lesqe pustika p-i ćhib spanikani) thaj pala lesθe o Walter Starkie, autòri e pustikaqo „The Zincali”.Katar lenqi idèa so o Rroma si jekh garaduni sel (nàcia), mesti katar-o dotǎrimàta thaj musajmàta, bibokhali pal-o love, putarde ilesqi thaj but khetani, savi avel andar jekh purani sel, o Helios Gómez kerdǎs konstrùkcia nevi, avere Representaciaça, sar jekh dostipen bi xolǎqo thaj bi thamǎqo, barvale kulturaça thaj siklo, kaj te del pes godi sar alegòria p-e Andalusiaqi sel, p-i republikani Espània thaj p-i mestǎrdi godǎ. Nas o angluno manuś so kerdǎs alegòria Rromenθar pe maj buxli tèma, ama ov sas o angluno Rrom te labǎrel akaja tasvir. PinŴarèlas i pagerdilèkta e Espaniaqe Rromenqi thaj kerdǎs cikne xromisarde lavustika kaj ćhivèlas anavnǎ thaj vakerde fràze, kidime pesqe rromane amalenθar. Labǎrdǎs akaja leksìka anda lesqe poèzie thaj mukhlǎs mothovimàta and-akaja ćhib.

Lesqe zumavimàta, andareça thaj ulavde and-e śeraja, kideren 130 patrinǎ, sa khetane lekhimàta vasteça thaj maśinaça. And-o aver zumavimàta, biande śaj pakǎl pes kaj te del bàza pesqe neve plastikone stilosqe, thàvdel katar-o surrealismo kaj te sikavel les sar godǎqo thaj ekspresiaqo ćhand, biulavdǒver andar-i rromani natùra thaj andar-i rromani zor kreaciaqi. Mukhlǎs vi jekh rodlǎripen pal-o flamènko, odolesqe so kerdǎs sas rodipen vaś-i tèma. Labǎrel pesqo buxlo Ŵenutno Ŵanipen vaś-o rromane gilǎ thaj vaś-o rromano khelipen, sar pesqo Ŵanipen pal-o surrealismo. O Helios Gómez na ròdel historikano ćaćipen, Ŵanel so i rromani nàcia avel andar-i India no ov na phirel pe akaja Ŵantrikani lìnia, lesqe si maj vasno te del and-i paramìći Exiptosqi, odolesqe so i zor e faraonenqi thaj i bibaxt e Exiptosqi and-o śeliberśa den les jekh maj zorali argumentàcia kaj te sikavel sa o dośa thaj bezexa so kerel o Primo de Rivera pesqe diktaturaça thaj pala lesθe o Frànko, desar i linia e Indiaqi. I paramìći e Exiptosqi pe aver rig del les śajutnipen te phandel i historia e xristanismoça thaj te arakhel paralèle and-i història e Espaniaqi. Akava dikhipen arakhlǒl vi and-i poèzia, so si te drabarel pes sar alegòria thaj na sar ćaćutni referènca.

Poèzie

Pesqe poèzie lekhavdǎs maj but ma śkar o bb. 1942 thaj 1956, maj but desar śel poème: historikane, kamipnasqere, sunenqere, Ŵenutne, sociàlo, erotikane, paramićenqere, kaj kidel anda trin literaturaqe corpus, kerde vaś-i publikàcia: „Credo dei Sur, Sonètura thaj Satara” (1946), „Otros Poemas” thaj „Erika”, jekh tèksto kaj laćhardǎs nevesθar pe avera Iilenθe maśkar-o b. 1954 aj 1956 b.) thaj agore duj pustikorra (lekhavde andar-o 1948 b.). Aćhon bi rendosqo anda jekh tèka „Poesias/notas” kaj si biś poèzie aj avera kotora, nesave and-i relàcia lesqe maj barikane projektoça „Erika”.

Del ćaćipen palem pe pesqi buti, kana siklǒl thaj federǎrel pesqo Ŵantripen andar-i leksikològia thaj i etimològia, andar-i poèzia thaj i mètrika aj vi andar but aver Ŵantrimàta.

Barvalǎrel pesqe serimàta thaj drabarimàta, na śindoj kotar-i cenzùra (rokhipen e drabavimasqo), e klasikonçar sar o Góngora aj o Lope de Vega, e poetençar andar-i generàcia e b. 27 sar o Altolaguirre, o García Lorca, o Alberti, o Gerardo Diego thaj e avrikane autorěnçar sar o Whitman, o Rimbaud, o Baudelaire, o Maiakovski, o francikane surrealiste, maśkar lenθe e nevederençar sar o Jacques Prévert. Pe bibaxt naśti te areslǎs Ŵi k-i nevikani literatùra e Espaniaqi, ni andar-i tèmica, ni pal-o mestǎripen. Angla so te merel, sas les śànca te pinŴarel domben kotar-i nevi maśkarmerimatenqi generàcia, poeten, novelisten, esaisten, ćiternen, maj but prdal-o kurkutne Revista de actualidades, arte y letras thaj Destino, thaj o doćhonutno Ateneo, save sikaven lesqe jekh aver sundal thaj jekh aver dostipen, but dur lesqe ideenθar thaj ekperiencenθar.

Lesqe poèzie keren sar rodimatenqo thaj Ŵanimatenqo laboratòrio, kaj zumavel verver literaturaqe droma. But ververipen arakhlǒl anda elsqe butǎ: tradicionàlo ćhand, griźaça vaś-i mètrika sar sonètura thaj klasìko satara, vazdime lèksika, prasavno klasicìsmo (satìra), epìka thaj lirìka, retorìka pal-i analògia thaj antitèza, realismo pal-i tèma somkhetani andar-i politìka thaj jekhe politikano-socialone andereça; arakhlǒn vi àkcie kotar-o mistikano estìlo kerde vaś-o konkùrso poezenqo and-i tèmica; zumavdǎs te phagel pesqo estllo kaj te kerel poèzie vaś-o eksistencialismo thaj intimismo.

I ući/lùngo poèzia-mothovipen „Erika”, anavǎrdi „Poèzia kotar-i ćingar thaj o suno» thaj „Gili kotar-o kamipen thaj i ćingar” si jekh manuskrìto ćitredino savo, sar „Credo dei Sur», pakǎl agirdino thaj zumavdǎs te del les avri. Sar and-o „Pacheco”, ćhuvel paśpaśe i somkhetani baxt thaj i Ŵenutni baxt, thaj plus akana lel sar bàza pesqi eksperiènca andar-i URSS, kaj phirdǎs te dikhel i komunistikani pràktika.Ov nakhavdǎs vi jekh but phari periòda, kana pharrilo zuralo mamuipen maśkar lesqi Ŵuvli, so sas vi mamuipen maśkar lesqo antidogmantismo thaj laqo kandipe e partiaqe, kaj sas but dini oj e partiaqe liniaqe, vi e kontrarevolucialone burokratismosqe, Ŵikaj sas ligǎrdo Ŵi k-o dukhamno ulavipen. 0 Ŵuvlikano Ŵeno śaj te ovel lesqi amalin, komunista andar-i Germània, i Irene Weber thaj laqi història vi śaj te ovel ćaćes andar lenqo kamipen. PinŴardile sas e Berlinosθe and-o 1929 b., somŴivde and-i Espània thaj nakhle khetane poćorǎl i francikani granìca and-o 1932 b. karing-i URSS. Maj anglal, o titulo lesqe Berlinosqe lilorresqo „Dias de ira”, vaś-o teròri tel-o thagaripen thaj i diktatùra so dikǎrdǎs o Primo de Rivera and-i Espània (alùzia e latinikane vorbaqe dies irae), kaj seravel and-i „Erika”, garavèlas, ambùrim, jekh polisemìa laqe gudle anaveça „Ira”. Ira vi si jekh anav so arakhlǒl butivar and-o poèzie e pustikaqe „Erika”.

O Helios Gómez si xor andra pesθe libertàrio, madikh so, sar avera domba thaj sikle, gelo karing-i komunistikani pàrtia, pe vràma, kaj savorre pakǎnas so akaja pàrtia sas i maj laćhi vaś-o sociàlo paruvipen.

Lesqo amalipen e grupença kaj sas mamuj-o raipen and-i Espània thaj maj but and-i Katalùnia sikavel i tra śavni ćingar maśkar-i disidència and-o komunismo thaj i oficiàlo komunistikani pàrtia. Ov pinŴarèlas i URSS, them kaj Ŵivdǎs, thaj pinŴarèlas vi o mumuipen kana musaj manuś te citǎrel pesqi opìnia andar-o musaìpen te marel pes mamuj-i borgezìa. And-o 1928 b. Ŵivdǎs othe duj ćhona, palal so astardǎs amalipen Amsterdamesqe marksistikane dombença. Lesqo kritìko divàno mamuj-i diktatùra sikavdǎs pes andar lesqi pozìcia sar anarkista, no e Belgiaqo autòri Max Deauville lias la pe pesqo anav kana sikavdili i publikàcia „Dias de Ira”. I dùjto var kaj gelo, dromarèlas aba sar somdasno k-o Partido Comunista Español, kaj kerdilo sas somŴeno kana sas avrićhudino andar-i Federació Comunista Catalana-Balear, mamujali e Moskvaqe. Kerdǎs buti sar maketista thaj źurnalosqo ćiterno and-e komunistikane periodìke (L'Hora thaj La Batalia, kotar-i F.C.C.B. thaj 0 B.O.C., and-o 1930 b., and-i Katalùnia; thaj pal-o źurnàlo kotar-o P.C.E. and-o Madrid, Mundo Obrero andar-o 1931 b.), sas but akjtìvo Ŵikana ćhindili lesqi buti kana sas phandavdo thaj gelo and-i tèmica and-o Maj 1932-tone b/θe. Nais e akcienqe kaj kerdǎs lesqo amal o Holandèzo Peter Alma, savo aźutisardǎs les te iklǒl e themesθar, sas mestǎrdo tel pakǎpen thaj akhardǎs les oficial o V.O.K.S. sar representàcia Espaniaqi and-o Maśkarthemutno Kongrèso e Proletarone Dombenqo and-o Leningràdo.

UŴardǎs and-i Bruksèla katar-o Baredivaj Ŵik-i Oktòbra i avtorizàcia pal-o drom, savi aresli lesqe and-i tàmna e 19 32qi. Beślo and-i U.R.S.S. Ŵi k-i Februàra 1934-qi, and-i Moskva thaj Leningràdo thaj kerdǎs buti organizaciençar, save pinŴaravènas o sovietikane kerimàta e avrutnenqe save avènas te dikhen i URSS. Kana ov beśèlas othe, maśkar- o bb. 1932 aj 1934, aresle katar-o Komintern neve ideològie, save anènas o dombikano realismo thaj rokhènas o dombipen, and-i fòrma lesqi sar sas vazdime Ŵi okona. Durilo katar-i oficiàlo estètika thaj gelo pal-o grafikano dombipen, kaj ìnke sas Ŵivdi i kreativitèta.

Palal jekh berś thaj paś, sar dikhǒl, lesqi opozìcia tradias les te naśel kòrkorro thaj sigǎrimaça, thaj mukhlǎs maj anglal e Ŵuvlǎ, savǎ kamèlas thaj śel ćitrimàta. Kana irindǎs k-i Barcelòna, and-o sungalo nilaj 1934qo, ov kòrkorro kerdǎs pesqe avtocenzùra.

A nd-o berśa 30-35, o droma kaj kerènas manuśa, save fajòlas lenqe i U.R.S.S. sas vasne labne vaś-i sovietikani reklàma thaj o Helios Gómez lèlas kotor and-i maśkarthemutni inteligència progreslsta, savi avèlas te dikhel o them. Lesqe tèkstura and-e Kataluniaqe republikane mèdie kerènas difùsia pal-o sovietikane eksperiènce so sas anda jekh zoralo mamipen e ratǒrigutne kapitalismoqe bibaxtagoreça. Lel bàza and-i komparàcia maśkar-e themesqi situàcia anglal thaj palal i revolùcia, kaj del sa o negatìvo àkcie pal-o nakhlo vaxt, thaj i nevi sistèma savi mandavel akanutnipen, progrèso thaj baxt savorrenqe. I ćingar thaj o phagipen ondile trin berś maj palal, and-o b. 1937, kana and-i Espania i komunistikano partìa ćhudel avri e anarkisten thaj e libertarien.

I dukhamni història e „Erikaqi” arakhel drom avri prdal jekh tragìko kerkipen, mothovdo anda an da jekh bari zor thaj śukaripen – madikh so jekh baro kotor aćhol amenqe bipinŴardo, sar i epìka and-i Anglia thaj e protagonistaqe aktivimàta odothe.

Nanaj but ber ś so e Helios Gomezesqe lekhavdimàta arakhlile thaj si avridine and-i pustik „Poèzie kotar-i ćingar thaj o suno 1942-1956” thaj ćaćimasθe miśto ovèla te iklǒl rinćhibǎrimàta anda but but ćhibǎ e Evropaqe, kaj te pinŴaren akaja literatùra so maj but manuśa.

I „Capilla gitana” – rromani khangerǒrri sar manifèsto

I khangerǒrri so makhlǎs o Helios Gómez and-o phandlipen e Barcelonaqo sikavel e Ŵuvlǎ pal-i proletàro ikonogràfia: tromani, zorali, patǐvali amalin thaj daj. Anda lesqe ćitrimàta, tuśaça, kerde maśkar-o bb. 1929 thaj 1939, i Ŵuvli sikavel pes pesqe ćhavença, mangindoj manro, dukhaven la o Ŵungalimàta andar-o śingale thaj o xelade. Si i dukhavdi daj kotar-i dasikani simbològia, no niklǒl akate anda jekh civìlo proletàrio madòna, viktìma tel-o bòmbe and-o cìklo „Horrores de la Guerra” thaj i piktùra „Evacuación y heroína”, sar and-i revolucionàri ikonogràfia, kaj marel pes and-o barbaripen pesqe amalença, murśençar, śastrinaça and-o vast thaj jagaça and-i jakh. I Aida Lafuente, but vasni Ŵuvli and-e Asturienqi revolùcia, manuśarel i „Revolùcia sikavindoj o drom e ćorrorrenqe”.

And-o maśkar e khangerǒrraqo, e „Milaqi Maxari (Daj e Devlesqi)”, savi ligǎrel o serben, sìmbolo e forosqo kaj brakhel, miazol p-i „Kali Maxari” andar lesqe poèzie. Si kalǒrri and-o muj odolesqe so si rromani Ŵuvli (o Helios Gómez Ŵal ìnke pal-o stereotìpo so o Rroma musaj te oven „kale” – vi ćaćimasθe, and-i Espània, akhardǒn „Kalé”) thaj si vi devli-daj e purani kosmològia (maj anglal andar-i dasikani relìgia). Si i Isis-Maria, phervalipnasqi devli savi biandǎs pesqe ćhaves, e Horuses, bi te ovel suti murśeça. O rromano ćhavo kaj ćitrel, and-i relàcia e Horuseça and-e Isisaqi angali, ćhavorro faraòno thaj Exiptaqo devel, si lesqo jekhorro ćhavo, o Gabriel, biando and-o 1943 b. E ćhavorresqi daj muli and-o b.1946 (te jertil la o Del) thaj o artìsta sadaj jekh berś Ŵivdǎs pesqe ćhavorreça, odolesqe so maśkar avera rokhimàta aj telavimàta, o phandlipe peravdǎs les katar-o dadipen thaj durǎrdǎs les e ćhavorresθar, so sas e poetasqe jekh but kerki dukh. O anav Gabriel, so sas o anav e maxare dadesqo e Sevillaqeresqo, si e poetasqo dùjto anav, savo sas siklo te labǎrel sar xoxavno (ja dombikano) anav, kana kerèlas buti sar grafista pal-i publicitèta vi te garavel pes; akale anaveça anavǎrdas vi e Seviliaqe heros anda pesqo romàno.

K-i „Capilla Gitana”, p aruvdǎs e Antonio Maćhinesqi gili „Angelitos Negros”, vaś-e barabaripnasqi idèa: and-o lesqo ćitripen, o rromane baśalne si kalorre lavne e devlikane thagaripnasθar, odolesqe so si len jekh ćoxanorro thaj lenqe garavdune pràktike paśanen len k-e devlesqe sfère thaj odolesθar si on pozitìvo maśkarne maśkar-o sundal thaj o Devel:

Ćiteme!a biando mire phuvǎθe,

E avrikane vurcaça

Ćiterne!a, tu savo Ŵas pal-o drom

Kaj phirde but phure korre ćiterne

Madikh so i Maxari si parni

Ć itre manqe kale lavnorren

So vi on resen Ŵi k-o devel

Sa o la ćhe kalorre,

Ćiterne!a , te ćitres kamipnaça.

Sosqe prastaves lenqi rang?

Te Ŵanes so and-o devel opre

Vi len kamel len o Devel.

Ćiterne!a, kaj ćitres maxaren aj khera

Te si tut ogi and-o trùpo,

Sosqe kana ćiterdǎn

Bisterdan e kalorren?

Savaxt kana makhes khangerǎ

Ć itres sukare lavnen,

Àmi nivar na des godi

Te ćitres jekh kalo lavnorro.

O lavne den les drom te marel godi p -o niraś. Kana na gilaben, si odolesθar so naj len laćhe nevimàta pal-o ogi, sar and-o „Casida del lanto”, poèzia tar-o García Lorca, so o artìsta inkerel vastlekhadi angarneça – avrial e phandlimasθar, sa o manuś sadaj roven thaj i dukh si kadi bari so xal vi e devlikane lavnen – vaj and-o satara kaj lekhavel e mudarde poetasqe patǐvaqe.

O nazismo, o frankismo, o maripen thaj bimanuśikane dukha

O estarde, save mangen te oven jertime and-i „capilla gitana”, si alegòria aj ilustràcia e śerajesqi C andar-e Helioesqei „Historia de los Gitanos” – o „Rromano martirològio”, kaj lipardǒl e Rromenqo samudaripen and-i història – lesqi Ŵenutni història, so kerdǎs pesqe ov vaś-i simbòlika: tel-o Horemheb and-i ćirlatuni Exipta, tel-o Timur Lang, tel-o baro raśaj o Cardenal Cisneros, tel-o Hitler. Paralel, o ćitripen andar-o b. 1948, o „Rromano Martirògio-Belsen” thaj lesqi poèzia „Belsen”, sikaven o Samudaripen e Rromenqo and-o dùjto maripen, and-i Euròpa savi paślili sas sar mati lubni tel-i kher e Hitlerosqi. Deportuime and-o Auschwitz, and-i Treblinka, and-o Oranienburg, and-o Bergen-Belsen thaj but aver thana, opretele 600.000 Rroma sas mudarde pe akala thana vaj mule katar-o bimanuśikane somtruimàta (kondìcie) kaj sasdine pe lenθe. And-o Bergen-Belsen, putardo and-o b. 1943 pe 20 kilomètre and-o nòrdo kotar-o Hanover, kaj aresle Ŵi 75.000 estarde, mule mìe aj mìe Rroma. Kana o anglikane xelade aresle othe and-o 1945 b. arakhle 13.000 laśa mudarde andar-o tifus.

O ćitripen e „Capilla”/qo thaj verver poèzie e Helmiosesqe labǎren i evangelikani retòrika te pukaven o mudarimàta kaj kerdǎs i khetani zor e katolikenqi thaj e khangerǎqi: pal-o o maripen, i dukh vi maj dur buxlǒl p-e Evropaqi mesmerig, and-i Espania, thaj o estarde kotar-o Franco pheren o tèmice. O phandlipen „Modelo”, kaj sas oxto berś o Helios Gómez, sas i palutni sàla angl-o mudaripen bute estardenqe. Maśkar-i Febrùara 1939qi thaj i Novèmbra 1955, sas odothe mudarde 1618 estarde. O nabasando ćorro xabe thaj o kidipen bute Ŵenenqo, save sas te beśen anda jekh tikno than khetane, anènas „naturàlo” meripe – so śaj akhardǒl pes „indirèkto mudaripen”, plus odola kaj sas ćhinde ja tasavde sastrnençar k-o krlo, sar kerèlas o Frànko. Musaj te phenas so i „Capilla Gitana” sas and-o paśipen e salaqo, kaj o estarde nakhlènas o palutno dives ja i palutni rat angla penqo mudaripen thaj odothe o Helios arakhlǎs but inspiràcia te marel pes mamuj-o bangipen e diktaturaqo.

I representàcia e manu śenqi, save mangen jertisaripen, si jekh alegòria e purgatoresqi so ande sas o Frànko thaj lesqe Ŵene p-e Espaniaqi phuv. Sikavel i relàcia maśkar-o dukha e estarde Rromenqe/espanikane thaj e dasikane religiaqi dukh. Thaj si tokam akaja ćitardi situàcia, savi si te ovel dikhli sar subversìvo katar-o bare raja, thaj sas te anel censùra opr-o Helios Gómez. O gaŴe avile te makhen o telutno dopaś e murśenqo kaj te na dikhlǒn e kanrale sirma.

Akava representatìvo vakeripen si barabar e Heliosesqe poeziençar thaj naśti te ulavdǒl lenθar ; ov paruvel pes and-o putardo politikano pukavipen pal-e Ŵuklane raja diktatòrǎ, and-o jekhto than pal-o T.E. (vaj „Tirano de España”), usurpatòri dośalo vaś-o dilipen so kerdilo mamuj-e Espaniaqi sel. Pukavel vi i hitlerikani Germània thaj e demokratikane europaqe thema, save aźutisarde e Frankos thaj so lenqo nevokolonialismo aźutisardǎs les maj dur vi pal-e Espaniaqo maripen: i xoxavni Ànglia na kamlǎs te lel kotor, irindoj o dumo e manuśenqe dukhenθar, madikh so lèlas kotor maj dur and-e Andaluciaqe mìne kaj te lel barvalimàta, thaj i Frància, savi Ŵuklane hipokriziaça estardǎs, phandlǎs, mardǎs thaj dias palpale e naśutnen and-e Frankosqe girǎ. Sar e Heliosesqe lekhavimàta, vi i „Capilla gitana” akharel o nàcie te kidinǒn mamuj i Ratǒrig thaj laqi uśtavni politika.

O Helios Gómez pakǎl so i rromani nàcia, anda pesqi speciàlo relàcia e naturaça, si la jekh sublimo ròla thaj śaj te agordas akaja prezentàcia lesqe politikane sundalesqi liparindoj duj kotora andar lesqi pròza:

„Khonik maj feder desar o phirutne Rroma na xakǎrde so i Natùra si ś ukar. Lenqo dombikano xakǎripen buxlǎrdǎs pes butivar angl-e Devlesqe śukarimata aj sumnalimàta, angl-o baripen e plajenqo thaj e derǎvěnqo; phirindoj pe phuvǎ thaj maśkar-o lenǎ, and-o veś, lośale dolinençar, angl-o rangvale umalǎ, o sungale koncertença e luludenqerençar, save buxlǒn maśkar-o baxtalo barvalipen thaj baśalipen e melodienqo; dikhindoj o bare perspektìve armoniozone linienqe, xasarde and-o horizòntǎ bi agoresqo, save na pinŴarebn aver grànice sadaj o dud thaj i baxt [...) Àma, aŴikaj baro te ovel o materiàlo śukaripen e Naturaqo, o ogǎlo sundal kotar-o sune, savaxt si te ovel maj buxlikano [...] Akala śukarimàta, save si maj dur prdal-o ćaćimàta, beśen and-o abstràkto thaj o abtràkto beśel and-o telkonsciènto, kaj sikavel pes pe sune. [Sadaj o rromano domb] si les ćaćimasθe kreativitèta, so lel ov andar-o estetìko phunda e sunenqe [...] O Rrom kerel katar-o dombipen jekh religia, kaj rrugisarel mistikanes, thaj sar domb ov maśkarel o sasundalutno thaj o cikno, maśkar-o reàlo thaj o abstràkto, maśkar-o sarkondivesutno bilondo ćaćipen thaj e sunenqi magia: phrajel maj opral e pasienθar, e ćorrovane interesenθar, e sensualone lośenθar thaj akala godǎθar, savi si tang, śuki, śudri, kidime pe pesθe thaj pherdi katar-i Ŵung so thàvdel andar-o fòndo thaj i fòrma e telutne Ŵivipnasqe, anda jekh sundal kaj thagaren i lògila thaj o rend. Si ov, kon tradel e manuśen prdal o banàlo Ŵi k-o uće phuvǎ kaj śaj te len ogi maj uźes, kaj śaj te pheren pen jalo nem thaj śirden te oven maj ogǎle Ŵene, aj te mestǒn cèrra e truposθar, kaj barǒl thaj Ŵamavdǒl baxtales andr-amenθ e o isipen kaj naj les isipen [la existencia inexistente - nirvana], savaxt an-i ćingar mamuj-o matariàlo thaj thulikano Ŵivipen e sundalesqo, jekh isipen so lesqo maj baro śukaripen arakhlǒl sadaj and-o surrealismo, ćaći thaj jekhorri bàza e śukaripnasqi thaj e rromane dombipnasqi.”

Carlos Munoz-Niete

Barcelona

Helios Gómez

Reprodukció: Helios Gómez Alapítvány